Fundación Vicente Risco

O sábado 11 de febreiro ás 20’00 horas, na sede da Fundación Vicente Risco, tivo lugar a inauguración da exposición Entroidos Populares Galegos, con fotografías de Henrique Acuña, Xosé Luís Alonso, Victor Vaqueiro, Hixinio Castillo e Xulio Gil. A exposición foi presentada polo comisario da exposición, Henrique Acuña e no acto interviron Teresa Devesa (concelleira de cultura de Allariz) e Arturo Lezcano (vicepresidente da Fundación Vicente Risco) Os participantes, que fixieron unha chamada á trasgresión durante estas festas, salientaron a importancia que para os galegos ten esta manifestación da nosa cultura, tan arraigada no noso patrimonio inmaterial.
                

BIENAL DA CARICATURA-OURENSE: Do 15 de marzo ao 2 de abril tivo lugar no Liceo de Ourense unha exposición de caricaturas de don Vicente Risco, propiedade da Fundación Vicente Risco, realizadas por diferentes autores (Castelao, Conde Corbal, Fernández Mazas, Huici, Virxilio, ...)

EXPOSICIÓN CULTURAS DO MUNDO. O 2 de abril inaugúrase na sede da Fundación Vicente Risco a exposición Culturas do Mundo organizada pola Escola de Danzas da Deputación Provincial de Ourense.

EXPOBOI. O xoves 25 de maio inagurouse na nosa sede a Exposición de fotografías sobre a Festa do Boi de 2005, organizada pola Fundación Xan de Arzua.

Auspiciada pola Dirección Xeral de Creación e Difusión Cultural, do 2 ao 20 de agosto mostrouse ao público na sede da Fundación a exposición O PAPAGAIO E A PEGADA DOS SENTIDOS, con fotografías de Maribel Longueira e poemas de Luísa Villalta.

O 20 de outubro, ás 20,30 horas, inaugúrase na sede da Fubdación a exposición Manuel María, poeta nacional, organizada pola ASPG. Don Francisco García, alcalde de Allariz, fixo unha semblanza do compromiso do autor chairego para con Galiza e os galegos. Acto seguido ten lugar un recital de poemas a cargo de Teresa Devesa. Encerran o acto Mini e Mero cun emotivo percurso musicado pola obra de Manuel María, moi apreciado polo público asistente.

O martes 31 de outubro un grupo de alumnos do CEIP P. Feijoo de Allariz visita a Fundación Vicente Risco para realizar unha actividade sobre a figura de Manuel María.